ដោយ : បន្ទាយ
កណ្ដាល ៖លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អមដំណើរដោយ លោករដ្ឋមន្ត្រីក្រសួងសាធារណការ និងដឹកជញ្ជូន លោកអភិបាលខេត្តកណ្ដាល លោក លោកស្រី និងមន្ត្រីជំនាញមកពីក្រសួង-ស្ថាប័នពាក់ព័ន្ធជាច្រើនរូប នាព្រឹកថ្ងៃអាទិត្យ ទី២១ ខែកក្កដា ឆ្នាំ២០២៤ បានចុះពិនិត្យវឌ្ឍនភាពការងាររៀបចំទីតាំងត្រៀមប្រារព្ធពិធីបើកការដ្ឋានគម្រោងព្រែកជីកហ្វូណនតេជោ ។

ទីតាំងស្ថិតនៅភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ។

កម្មវិធីបើកការដ្ឋានគ្រោងនឹងធ្វើនាថ្ងៃទី៥ ខែសីហា ឆ្នាំ២០២៤ខាងមុខ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រី។

សូមរំលឹកថា កាលពីរសៀលថ្ងៃទី១ ខែកក្កដា ឆ្នាំ២០២៤ លោកស៊ុន ចាន់ថុល ឧបនាយករដ្ឋមន្ត្រី ដូចខាងលើបានចុះទៅពិនិត្យទីតាំងបើកការដ្ឋាននេះម្តងរួចមកហើយ ។

សូមរំលឹកថា គម្រោងព្រែកជីកហ្វូណនតេជោគឺជាព្រែកជីកដែលមានប្រវែង ១៨០គីឡូម៉ែត្រដែលត្រូវបានស្នើឡើងក្នុងប្រទេសកម្ពុជាដែលតភ្ជាប់កំពង់ផែស្វ័យតភ្នំពេញនាទន្លេមេគង្គជាមួយក្រុងកែបនិងឆ្នេរសមុទ្រប្រទេសកម្ពុជានៃឈូងសមុទ្រថៃ។

ព្រែកជីកនេះនឹងចាប់ផ្តើមពីព្រែកតាកែវនៃទន្លេមេគង្គកាត់តាមព្រែកតាឯកនៃទន្លេបាសាក់និងចុងក្រោយបញ្ចូលគ្នាជាមួយព្រែកតាហ៊ីងនៃទន្លេបាសាក់ក្នុងស្រុកកោះធំ។
ព្រែកជីកនេះនឹងតភ្ជាប់ រាជធានីភ្នំពេញដោយផ្ទាល់ជាមួយនឹងកំពង់ផែ សមុទ្រទឹកជ្រៅតែមួយគត់របស់ប្រទេសក្នុងខេត្តព្រះសីហនុនិងកំពង់ផែថ្មី ក្នុងខេត្តកំពត។

ផែនការបច្ចុប្បន្នរួមមាន: ការសាងសង់ទំនប់ចំនួនបីដែលមានច្រកទឹកនិង ស្ពានចំនួន១១។ ប្រឡាយនេះនឹងមានទទឹង១០០ម៉ែត្រ និងជម្រៅ ៥.៤ម៉ែត្រ ដែលអាចទ្រទ្រង់នាវារហូតដល់ ៣,០០០ DWT ។

កាលបរិច្ឆេទបញ្ចប់គោលដៅគឺ២០២៨។ វាត្រូវបានគេរំពឹងថានឹងចំណាយអស់ ១.៧ពាន់លានដុល្លារ។

គម្រោងនេះត្រូវបានផ្តល់មូលនិធិទាំងស្រុងដោយ (CBRC:China Bridge and Road Cooperation ) ដែលការសិក្សា២៦ខែ បានចប់ខែមីនា ឆ្នាំ២០២៤ ហើយគ្រោងបើកការដ្ឋានសាងសង់ជាផ្លូវការនៅខែកក្កដាឆ្នាំ២០២៤ ។គម្រោងនេះនឹងត្រូវបានបង្កើតឡើងក្រោមកិច្ចសន្យាBOT (សាងសង់-ប្រតិបត្តិការ-ផ្ទេរ)។

បច្ចុប្បន្នកម្ពុជាពឹងផ្អែកយ៉ាងខ្លាំងលើការប្រើប្រាស់កំពង់ផែវៀតណាមជាពិសេសកំពង់ផែកៃមែប។

ព្រែកជីកហ្វូណនតេជោថ្មីនឹងកាត់បន្ថយការពឹងផ្អែកនេះយ៉ាងខ្លាំង។ វៀតណាមក៏បានលើកឡើងពីការព្រួយយបារម្ភខាងបរិស្ថាន។

ការកសាងព្រែកជីកនេះក៏ត្រូវបានគេមើលឃើញពីផលប៉ះពាល់មួយចំនួនផ្នែកបរិស្ថាននិងភាពតានតឹងផ្សេងៗពីសំណាក់បណ្ដាប្រទេសជិតខាងនិងក្រុមប្រឆាំងរដ្ឋាភិបាលមួយចំនួនសម្ដែងនូវភាពមិនពេញចិត្តចំពោះវត្តមាននៃព្រែកជីកនេះឡើយ។

ព្រែកជីកនេះឆ្លងកាត់ខេត្តចំនួន៤ រួមមានខេត្តកណ្តាល ខេត្តតាកែវ ខេត្តកំពតនិងខេត្តកែប ។

តាមការប៉ាន់ស្មាន មានចំនួនប្រជាជនសរុបប្រមាណ១លាន៦សែននាក់ រស់នៅអមសងខាងព្រែកជីកនេះនិងទទួលផលពីព្រែកជីកនេះ។សន្ទះផ្លូវនាវាចរណ៍មាន០៣កន្លែង ស្ពាន១១កន្លែង ផ្លូវអមសងខាងប្រវែងសរុបប្រមាណ២០៨គីឡូម៉ែត្រ។

ដោយគ្រោងសាងសង់ប្រើប្រាស់ពេលវេលាចំនួន០៤ឆ្នាំ ហើយគ្រោងនឹងចាប់ផ្តើមសាងសង់ដើមខែកក្កដាឆ្នាំ២០២៤។ កសាងព្រែកជីកហ្វូណនតេជោ គឺកាត់បន្ថយរយៈពេល ចម្ងាយនិងតម្លៃនៃការដឹកជញ្ជូននាពេលបច្ចុប្បន្ន ការបង្កើតតំបន់ពាណិជ្ជកម្មនិងមជ្ឈមណ្ឌលភស្តុភារកម្ម ការអភិវឌ្ឍផែរណបថ្មីៗជាច្រើន ការពង្រីកតំបន់ អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ ការជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា ការបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញនិងកំពង់ផែផ្សេងៗទៀត ការជំរុញការអភិវឌ្ឍទីក្រុង នគរូបនីយកម្ម និងការជំរុញការរីកចម្រើនផ្នែកអចលនទ្រព្យ។

ជុំវិញព្រែកជីកនេះផងដែរ អតីតនាយករដ្ឋមន្ត្រីសម្តេចតេជោហ៊ុន សែនបានបញ្ជាក់ទៀតថា ព្រែកជីកហ្វូណនតេជោនឹងជួយបង្កើនផលត្រី និងការចិញ្ចឹមត្រីរបស់ប្រជាពលរដ្ឋ ជាពិសេសនឹងជួយរំដោះទឹកជំនន់ ពេលកម្ពុជាមានជំនន់ទឹកភ្លៀង។

បន្ថែមពីនេះ ព្រែកជីកហ្វូណនតេជោ ក៏នឹងរួមចំណែកជួយដល់វិស័យទេសចរណ៍ ហើយប្រជាពលរដ្ឋនឹងទាញបានប្រយោជន៍ពីការធ្វើទេសចរណ៍ ៕